හිමාලයේ ඇතැයි කියන මොකක්ද මේ ඡද්දන්තය

හිමාලය පර්වතයෙහි පිහිටි දිගින්ද පළලින්ද ගැඹුරින්ද පනස් යොදුන් ඇති අනවතප්තය, කර්ණමුණ්ඩිය, රථකාර්ය, ඡද්දන්තය, කුණාලය, මන්දාකිණිය, සිංහ ප්‍රතාපය යන විල් සතින් සිවුවැන්න නම් 'ඡද්දන්ත' යැයි කියැවේ.

මේ විල් මැද ‍ෙදාළොස් යොදුන් පමණ ජලය ඉඳුනිල් මිණි රැසක් බඳුය. එහි සෙවෙල් ආදී යමක් නැත. ඒ ජලය සිසාරා යොදුන් යොදුන් පමණ පුළුල ඇති හෙල්මැලි වනය, නිල්මහනෙල් වනය, රත්මහනෙල් වනය, සුදු මහනෙල් වනය, රත් පියුම් වනය, සුදු පියුම් වනය, ඇඹුල වනය යැයි සත් වනයක් පිළිවෙළින් පිහිටියේය. මේ සත් වනය සිසාරා තවත් යොදුන් යොදුන් පමණ පුළුල් දස වනයකි. එයට ඉක්බිතිව එකිනෙක සිසාරා පිහිටි තවත් වන රැසක් වෙයි. ඉන් අවසන්ව පිහිටි හුණ වනය සිසාරා පර්වත සතක් ඇත.

ඒ පර්වතයන්ගේ පිට දිශාවෙහි පටන් පළමු පර්වතය චුල්ලකාලී නම්ය. යොදුනක් උස ඇත. දෙවැනි පර්වතය මහාකාල නම්ය. දෙයොදුනක් උසය. තෙවැනි පර්වතය උදක් පාර්ශ්ව නම්ය. තුන්යොදුන් උසය. සිවු වැනි පර්වතය චන්ද්‍රපාර්ශ්ව නම්ය. සතර යොදුන් උසය. පස්වැනි පර්වතය සූර්ය පාර්ශ්ව නම්ය. පස් යොදුන් උස ඇත. සවැනි පර්වතය මණි පාර්ශ්ව නම්ය. සයොදුන් උසය.

සත් වැනි වූ සත්යොදුන් උස ඇති ස්වර්ණ පාර්ශ්ව නම් පර්වතය ඡද්දන්ත විල සිසාරා පාත්‍ර මුවවිටක් මෙන් සිටියේය. එහි ඇතුළත ස්වර්ණවර්ණ යැයි කියැවේ. එයින් නික්මෙන රන්වන් පැහැයෙන් ඡද්දන්ත විල ළහිරු මඬලක් මෙන් බබළන්නේ යැයිද ප්‍රකාශ වේ.

ඡද්දන්ත විලෙහි ඊසාන කොනෙහි අට දහසක් අරළුයෙන් හොබවන ඉඳුනිල් පර්වතයක් බඳු මහ නුග ගසක් ඇත. ඡද්දන්ත නම් ඇත් රජ තෙමේ ග්‍රීෂ්ම සමයෙහි අටදහසක් ඇතුන් පිරිවරාගෙන එහි මුල අරළු අතුයෙහි සිටින්නේය. විලට බටහිර වූ රන් පර්වතයෙහි ‍ෙදාළොස් යොදුන් පමණ වූ කාංචන ගුහා නම් ලෙනකි. ඡද්දන්ත ඇත් රජු වැසි කල එහි ගත කරන බවත් කියැවේ. කෙතරම් සොඳුරු වර්ණනයක්ද?