පැරණි ජීවනෝපාය ක්‍රම හා බැදුණු සිරිත් විරිත් (සාම්ප්‍රදායික සන්නිවේදනය)

             සිරිත් විරිත්,ඇදහිලි විශ්වාස යනු රටක සංස්කෘතිය පිළිබිඹු කෙරෙන එක් පැතිකඩකි. මිනිසුන්ගේ ජීවනෝපාය මාර්ග මුල්කර ගනිමින් විවිධ සිරිත් විරිත් ඇදහිලි ආදිය නිර්මාණය වී ඇති බව මා දැනගත්තේ මාගේ පියාගෙනි. වී ගොවිතැන, හේන් ගොවිතැන ප්‍රධාන ජීවනෝපාය කරගත් මාගේ පියා දක්ෂ ගොවියෙකි.ඒ හා බැඳුණු සිරිත් විරිත් පිළිබඳ මනා දැනුමක් තාත්තා සතුවිය.මට දැන් සිතෙනුයේ ඒ ගැන හොඳින්ම දන්නා එකම පුද්ගලයා මගේ තාත්තා කියායි.ඒ තරමටම ඔහු තුළ ඒ පිළිබඳ පිරිපුන් අවබෝධයක් තිබුණි.අපේ මුළු පවුලට ම බත සපයන තාත්තාගෙ එකම රැකියාව වූ ගොවිතැන හා සම්බන්ධ සිරිත් විරිත් ගැන මම තාත්තා සමඟ කතාවට වැටුණේ මෙසේය.

“ තාත්තට අද මහන්සි පාටයි නේද "

" ලොකු මහන්සියක් නෑ පුතේ මේවා පුරුදු වෙන්න කරන දේවල් නෙමෙයිනේ "

" තාත්තට තේ එකක් හදන් එන්නම් "

" හා, ඒක හොඳයි."

මද වේලාවකට පසු තාත්තා අතට තේ කෝප්පය රැගෙන විත් දුන් මා  ඔහු අසළින්ම හිඳ ගත්තේ ඔහු හා බර කතාවකට වැටීමට ය. තාත්තා ද එය තේරුම් ගත් බව ඔහුගේ බැල්මෙන් මට වැටහුණි.

" මොකද පුතේ, ලොකු කතාවක් කරන්න වගේ ලෑස්තිය"

" ඔව් තාත්තා, මට තාත්තගෙන් දෙයක් දැනගන්න ඕන"

"මොකද්ද? කියහන්කො බලන්න"

" ඔය හැම රැකියාවකට ම අදාළ වෙච්ච පැරණි සිරිත් විරිත් තියනවා නේද? "

" ඔව් ඉතිං"

" මට ආසයි වී වගාවට බැඳිච්ච සිරිත් විරිත් ගැන තාත්තාගෙන් දැනගන්න"

"හා...ඒකද මේ..මං ඒත් බැලුවා මොකාටද මේ එන්න හදන්නේ කියල"

මඳ සිනහවක් නගමින් තාත්තා කතාව ඇරඹුවේ මෙසේ ය.

" කෘෂිකර්මාන්තයට ලොකු ඉතිහාසයක් තියෙනවා පුතේ.ඒ අතර ප්‍රධානම ස්ථානය හම්බෙන්නේ වී ගොවිතැනට.වගාව පටන් ගත්ත දවසේ ඉඳලා අස්වනු නෙලන දවස වෙනකල් ඒකට අදාල හැමදේම වගකීමෙන් කරන්න ඕන.වී ගොවිතැනත් එක්ක බැඳිච්ච පුදපූජා,සිරිත්විරිත් ගොඩක් තියෙනවා ගොවිතැන එක්ක බැඳුණු ලොකු නිර්මාණයක් තමයි වැව.වැවකින් මුලින්ම ගොවිතැනට ඕන කරන ජලය ලබා දීමේ කටයුත්ත අපි දියවර මංගල්‍ය කියලා තමයි හඳුන්වන්නේ"

"දියවර මංගල්‍ය කියන්නේ මොකද්ද තාත්තෙ"

" වෑකන්ද මත්තෙ කිරි උතුරවල වැව් ජලයට වැඳල සුබ නැකතින් ගොවි බිම්වලට ජලය ලබා දෙන එක.. ගොඩක් වෙලාවට පවුලේ අය එකතුවෙලා තමයි ගොවිතැන් කටයුතු සිද්ධ කරන්නේ. හැබැයි ඔය ආරාම වගේ ඒවට අයිති කුඹුරු වල "වෙහෙර් දසුන්" කියල හඳුන්වපු විහාර සන්තක දාසයො තමයි යොදාගන්නේ. සාමාන්‍ය පවුල් වල ගොඩක් දුරට කුලී කාරයෝ දාලා වැඩ කරවනවා. මෑතක් වෙනකම්ම ඔය අත්තම් ක්‍රමය කියල. එකකුත් තිබුණා.සිංහලයගෙ සහයෝගිතාවය තමයි ඒකෙන් පෙන්නන්නෙ"

" එතකොට තාත්තේ ඔය කයිය කියලා කියන්නෙත් ඒ වගේ එකක් නේද?"

" ඔව් පුතේ.. ඒක වෙන්නේ ඔය ගොයම් කපන දවසට නේ.කුඹුරෙ අයිතිකාරයා හවස් යාමේ බුලත් අතකුත් අරන් ගෙවල් වලට ගිහින් "මගෙ කුඹුරෙ හෙට ගොයම් කපනවා"කියලා පිරිසට ආරාධනා කරනවා. ඒ බුලත් කොළ ගන්න අය තමයි පහුවදා ගොයම් කපන වැඩේට එන්නෙ. එතකොට අරගෙන ගියපු බුලත් අතේ අඩුවෙච්ච බුලත් කොළ ගානට වැඩට එන පිරිසෙහි ගාන බලා ගන්න පුලුවන්. ඒ ගානට තමයි ගෙවිලිය ඇඹුල සූදානම් කරන්නේ. කයිය දවසට දෙන කෑම අපි කයිබත, මුත්තෙට්ටුව, වෑදම කියල හඳුන්වනව"

"එතකොට තාත්තෙ කමත් භාෂාව කියලා එකකුත් තියෙනවා නේද ගොවිතැනේදී.මට මතකයි ඉස්කෝලේ පාඩමකුත් තිබුණා."

" කමත කියන්නෙ පුතේ ගොවියෝ ලොකු භක්තියකින් සලකපු ස්ථානයක්.අපි මේකට කළවිට කියලත් කියනවා.පුතා ඉගෙනගත්ත නම් කියන්න බලන්න කමතෙදි අපි භාවිත කරන වචන ටිකක්"

"උදැල්ලට උදලු ගොවියා කියනවා,මී හරක්ට අම්බරුවන් කියනවා,කපපු ගොයම් වලට උප්පිඩි කියනව, ගොයම් ටිකක් එකතු වුණාම ගොයම් මිටියක් කියනවා මාප් පිඩ කියලත් කියනවා, ගොයම් මිට ගොඩ ගැහුවම ගොයම් කොළය කියලා තමයි කියන්නේ"

" හරි, බොහොම හොඳයි පුතේ" 

" එතකොට තාත්තේ අපි මේ අස්වනු නෙලනකන් ගොයම් ආරක්ෂා කරගන්නේ කොහොමද? එක එක සතුන්ගෙන් හානි වෙනවා නේද නැත්නම් ගොයම් වලට"

" ඔව් පුතේ එහෙම වුනොත් අපිට හොඳ අස්වැන්නක් ලබා ගන්න බැරි වෙනවා. කරපු හැම වැඩකම ප්‍රතිඵල හීන වෙනවා. ඒ හින්දා අපි ඒ සතුන්ට හානියක් නොවෙන විදිහට ක්‍රම හදාගෙන තියෙනවා ගොයම ආරක්ෂා කරගන්න.
පළවෙනි එක තමයි සොකඩ බැඳීම.ගල් පුරවපු ටින් ටිකක් තමයි මේකට අපි යොදා ගන්නේ. සාමාන්‍යයෙන් දකුණේ අපි මේකට කියන්නේ ටකරං බැඳීම කියලා. දිගාමඩුල්ලෙදි අතු වැල කියලා හදුන්වනවා.
දෙවැනි ක්‍රමේ තමයි සේරංගාව සවිකිරීම. සේරංගාව කියන්නේ හුළං පෙති වලට. තවත් සමහරු උණ පුරුක් වලින් වක්කඩ ලග දිය හොල්මන අටවනවා. ආයේ ඔය කුරුල්ලන්ගෙන් වන හානි අඩු කරගන්න උන්ට වෙනම ලියද්දක් වෙන් කරනවා. අපි කුරුලු පාළුව කියලා කියන්නේ ඒකට. ගොවියො රාත්‍රියට පැලට වෙලා පැල් කවි ගායනා කරන්නේ ඔය අලින්ගෙන් වන හානි වලක්වා ගන්න.
     ගොඩක් අය ගොවිතැන් කටයුතුවලදි නැකැත් වෙන් කරනව සුභ දවස් හා අසුභ දවස් කියලා. බ්‍රහස්පතිදා, සෙනසුරාදා, සඳුදා වගේ දවස් සුභ දවස් විදියටත් අඟහරුවාදා, සිකුරාදා, ඉරිදා වගේ දවස් අසුභ දවස් විදියටත් තමයි සලකන්නේ. මේ නැකත ගැන ලියවෙච්ච ජන කවියකුත් මං අහල තියෙනවා.

"අනේ තාත්තේ ඒ කවිය කියන්නකො"

මා තාත්තට බොහෝ පෙරැත්ත කළේ ඔහු කවි කීමට උපන් හපනෙක් බව දන්නා නිසාවෙනි. ඔහුගේ හඬින් එය අහන්නට තදබල ආශාවක්  මා හට ඇතිවිය.මද වේලාවක් කල්පනාවේ නිමග්න වූ තාත්තා කවිය පටන්ගත්තේ මෙලෙසයි.

"අහගෙන ඉදිංකො එහෙනම්"

නැකැත් බලා වපුරන දින    නියමය 
සැපත් හොඳා සුභ ඵල ගෙන   දීම ය 
පිටත් කලා අටුවට වී          ගැනුමය 
ගෙනත් නෙළා මැන වී දිය   දැමුමය 

"හරිම ලස්සනයි තාත්තේ"

තාත්තා ඊට මද සිනහවක් පෑවා පමණි. නැවතත් ඔහුගේ කතාව ආරම්භ කළේය.

"ග්‍රාමීය ප්‍රදේශවල තිබුණු තව සිරිතක් තමයි පුතේ පන්සල් වලට අයිති කුඹුරුවල වගේම වෙදමහත්තයා, ගුරුවරු වගේ අයගේ කුඹුරු වල නොමිලේම වැඩ කරලා දෙන එක. කෘතගුණ සැලකීම තමයි ඒකෙන් පෙන්නන්නේ. අස්වැන්න නෙළුවට පස්සෙ තියෙන වැදගත්ම කටයුත්ත තමයි අලුත් සහල් මංගල්‍යය.දළදා මාලිගාව,ශ්‍රී මහා බෝධිය,කතරගම කිරිවෙහෙර වගේ බෞද්ධ පූජනීය ස්ථාන වල තෙරුවන්ට අගසස් කොටස පුද දීලා පින් සිතුවලි ඇති කරගන්නවා. නුවර කලාවියෙ නම් පුල්ලෙයාර් ඒ කියන්නේ ගණ දෙවියන්ට කිරි ඉතිරවීම තමයි සිරිත.. අලුත් සහල් වලින් පන්සලට දාන දෙන එක, අම්මා තාත්තට අලුත් බතින් සංග්‍රහ කරන එක චාරිත්‍රයක් විදියට කරනවා වගේම එය ඔවුන් අතර සහජීවනය ගොඩනැගෙන්නත් එක හේතුවක් බවට පත් වෙලා තියෙනවා."

" තාත්තා කතාව එලෙස අවසන් කළේ ඊළඟ දිනයේ හේන් ගොවිතැන හා බැඳුණු සිරිත් විරිත් ගැන මා හට කියා දීමේ පොරොන්දුව පිටයි. ඉන්පසු මා අඳුරු අහස දෙසට නෙත් යොමු කරමින් තාත්තා තුළ සාම්ප්‍රදායික සිරිත් විරිත් පිළිබඳව ඇති මේ දැනුම කොතෙක් දැයි මඳ වෙලාවක් කල්පනා කොට එතැනින් නැගී සිටියේ තාත්තා පිළිබඳ උපන් මහත් ආඩම්බරයක් ද සමගිනි......
   
                                           ..නිමි..
           

කොර මැණිකේගේ දුර්වලකමින් සල්ලාලයකු ප්‍රයෝජන ගත හොත් ඒ නොහොබිනාකමේ ප්‍රතිඵලය තමන් භුක්තිවිඳි දේපළ සියල්ලට වග කියනු ඇත. පෙළපත් දෙකක්ම සුනුවිසුනු කල මඩුවන්විල වලවුවේ ශාපය පිළිබද සැගවුණු කතාව මෙන්න

                                    මුළු මහත් නින්දගමම නිදිවර්ජිතව බලා සිටින්නේ කොයි මොහොතේ කෙබඳු පණිවිඩයක් වලව්වෙන් ඒද කියාය. අක්කර හතළිස් දහසකට ආසන්න නින්දගම් භූමිය පුරා අණසක පැතිරූ ‘මඩුවන්වෙල දිසාවේ’ සිය සයනයේ හාන්සි වී මහත් ආයාසයෙන් හුස්ම ගනිමින් සිටියි. කෙර මැණිකේ තමන්ගේ එකම ශක්තිය වූ පියාණන්ගේ අවසන් මොහොත දෙස වික්ෂිප්තව බලා සිටින්නේ මින් මතු තමන්ට වන්නේ කුමක්දැයි නොදැනය. කලවානේ මැණිකේ සිය සැමියා දෙස ආදරයත් සානුකම්පාවත් මුසු වූ හැඟුමින් බලා සිටින්නීය. එහෙත් දිසාවේට එය දැනෙන්නේ කුමාරිහාමි කලකිරීමෙන් තමන් දෙස බලා සිටිනවා සේය.

මුල් මැණිකේ කොර වූ දියණියක උරුම කර මෙලොව හැර ගිය පසු තමන්වත් ඒ දියණියත් බලාගත්තේ කලවානේ මැණිකේ බව ඔහුගේ හෘදයසාක්ෂිය හොඳින් දනී. එහෙත් දේපළ සම්බන්ධව තීරණයේදී තමන්ගේ ආබාධිත දියණිය මෙන්ම බිරිය මේ මහා නින්දගමේ උරුමයෙන් ඉවත් කිරීමට දිසාවේ ගත් තීරණය ඔහුගේ සිතට වද දෙයි.

මඩුවන්වෙල පෙළපත් නාමය ගත්තද ඒ නමට තමන්ගේ සැබෑ හිමිකමක් නොතිබුණු බවද ඔහුගේ සිත කකියන්නට හේතුවකි. සිය තරුණ මව හා විවාහ වී සිටි මඩුවන්වල නමැත්තා තමන් පිළිසිඳ ගන්නටත් පෙර මිය ගිය බව ඔහු දනී. එනිසා මඩුවන්වෙල පරපුර අවසන් වූයේ තමා බිහි වන්නටත් පෙර බව ඔහුට සිහි වෙයි. තමන්ගේ සැබෑ පියා වූ මවගේ දෙවැනි කසාදයේ මොලමුරේ ලේ උරුමයට මඩුවන්වෙල දිසාවේ සිය දේපළ පවරන්නේ සැක සංකා දෙකක් පෙරදැරිවය. එකක් නම්, තම මව කළා මෙන්ම කලවානේ මැණිකේද තමන්ගෙන් පසු තනි නොතනියට නොගැළපෙන බින්නයක් කරගත හොත් නුසුදුස්සකුට නින්දගම් උරුමය පැවරෙන්නේය.

දෙවැන්න තම ආබාධිත දියණිය – කොර මැණිකේගේ දුර්වලකමින් සල්ලාලයකු ප්‍රයෝජන ගත හොත් ඒ නොහොබිනාකමේ ප්‍රතිඵලය තමන් භුක්තිවිඳි දේපළ සියල්ලට වග කියනු ඇත. මේ දෙකරුණම රදළ දේපළ සම්මතයට විරුද්ධය. එහෙත් කලවානේ මැණිකේගේ මෙන්ම කෙර මැණිකේගේ හදවතේ වේදනාව මඩුවන්වෙල නමට මෙන්ම මොලමුරේ පරපුරට ශාප කරනු ඇත්දැයි ඔහුට සැකයක්ද මතු වෙයි. ඔහුගේ තේජස ගතේ වේදනාවෙන් මැකිය නොහැකි වුවත් හදවතේ වේදනාවෙන් මැකී ගොස් ඇද්දැයි කලවානේ මැණිකේටද සිතේ.

දිසාවේගේ හොඳම ගෝලයා වූ ජුවානිස් අමතන මැණිකේ පන්සල වෙත සේවකයකු යවා නායක ස්වාමීන් වහන්සේට තොරතුරු දන්වා වඩම්මන්නැයි උපදෙස් දෙයි. වෙනෙකකු ගියහොත් පමා වේයැයි සිතා ජුවානිස්ම නාහිමියන් සොයා දිව යයි. හාමුදුරුවන් වෙත වැඳ නමස්කාර කොට සිය ‘හාන්දුරුවන්ගේ’ තත්ත්වය පැහැදිලි කරන ඔහු සමඟ නාහිමියන් වලව්වට වඩින්නේ තවත් දෙනමක් කැටුව පිරිත් දේශනා කීරීමටය. අභිමානවත් සිංහල බෞද්ධයකු වූ මඩුවන්වෙල දිසාවේ වෙව්ලන දෑත් එක් කොට සංඝයා වහන්සේට නමස්කාර කිරීමට උත්සාහ දරයි.

ඔහුගේ මුවින් නිකුත් වූ අවසන් අණ වූයේ නාහිමියන්ට පූජා කිරීමට වලව්වේ භාණ්ඩ කීපයක් ගෙන එන ලෙස සිහින් හඬින් සේවකයන්ට කළ දැන්වීමයි. පිරිත් සජ්ඣායනය අවසන් වීමට පෙරම තෙවරක් සාධුකාර දෙන දිසාවේ සිය සිය අවසන් සුසුම වාතලයට මුසු කළේය. අක්කර හතළිස් දහසක් පමණ වූ නින්දගම පුරා මේ පණිවිඩය පැතිරීමට මිනිත්තු හතළිහක් වත් ගත නොවන්නට ඇත.

වලව්වේ මෙතෙක් පැවැති උත්සවවලදී මෙන්ම දිසාවේගේ අවසන් කටයුතුවලදීද සැරසිලිවලින් අඩුවක් නොවීමටත්, උඩරට චාරිත්‍රානුකූලව දේහය රැඳි චිතකය ගිනි දැල්වීමටත් පිරිස විසින් කටයුතු යොදන ලදි. මඩුවන්වල මුදලින්දාරාමාධිපති කෑල්ලේ සාරානන්ද හිමියන් ප්‍රමුඛ සංඝයා වහන්සේ පාංශුකූලය දුන්හ. කොතරම් හොඳ-නොහොඳ තිබුණද අවසන් හුස්ම හෙළූ අයකුගේ අගුණක් කීම සිංහලයේ පුරුද්දක් නොවේ.

එසේම මඩුවන්වෙල දිසාවේ වැන්නකු වෙනුවෙන් එය කෙසේ වත් සිදු වන්නේ නැත. එනිසා නැඟී සිටින්නේ රක්වානේ රණසිංහ කිවිඳුය:

ඔටුනු නොපලන් රජකු ලෙස ආධිපත්‍ය පතුරමින්, අධිරාජ්‍යවාදීන්ගේ සුදු කුමාරයන්ට අභියෝග කරන්නට හැකි කළු කුමාරයකු ලෙස මඩුවන්වෙල දිසාවේට සිය තේජස පෙන්වන්නට හැකි වූයේ පරම්පරා ගණනක් පුරා අඛණ්ඩව වර්ධනය කරගත් ධනය, බලය, කීර්තිය නිසාය. ඒ ඉතිහාසයේ සොඳුරු අඳුරු තැන් ක්‍රිස්තු වර්ෂ 1521 දක්වා ගමන් කරන බව මඩුවන්වෙල ඉතිහාසය සොයන බොහෝ දෙනාගේ මතයයි. ඒ කතා මෙන්ම කාල තිරය සඟවන මඩුවන්වෙල කතා සොයා අපි ගියෙමු.

ඇඹිලිපිටියෙන් කොලොන්න බුළුතොට පාරේ සැතපුම් පහළොවක් පමණ මඟ ගෙවා කඳුවළල්ලකින් වට වූ නිම්නයක පිහිටි වලව් භූමිය ආසන්නයේ මඩුවන්වෙල වලව්ව පිහිටා තිබේ. එහෙත් රජ මැඳුරක මෙන් පවුරු තුනකින් වට වූ වලව් භූමියේ පිටක පවුරේ ඇති ගල් උළුවස්සෙන් ඇතුළු වීම තහනම්ය.

මඩුවන්වෙල පිළිබඳ වෛද්‍ය ශාන්ත දුනුකාර ලියූ ‘මඩුවන්වෙලට පියමං’ පර්යේෂණාත්මක කෘතියේ ඇති කවියක් මට මතක් විය. අපි අනෙක් දොරටුවෙන් ඇතුළු වීමු. දෙවැනි පවුරේ ගල් දොරටුවෙන් ඇතුළු වන අප පිළිගත්තේ විමලසිරි මහතාය.

“ඔය දොරටුවත් හදලා තියෙන්නේ සුද්දට හිස නමාගෙන එන්නලු. ඔතනින් අශ්වයා පිටේ ඔළුව කෙළින් තියන් එන්න පුළුවන් දිසාවේට විතරයි. අනෙක් හැමෝම අශ්වයාගෙන් බහින්න හරි හොඳටම නැවෙන්න හරි ඕනෑ. වලව්වට එන සුද්දන් මෙල්ල කරන්න තමයි ඔය ඔක්කොම කරලා තියෙන්නේ.” අක්කර දහස් ගණන ක්‍රමයෙන් හීන වී දැන් ඉතිරිව ඇත්තේ හාත් පස රූස්ස ගස්වලින් පිරුණු අක්කර හයක පමණ බිමකි. ඒ මැද අතීත ශ්‍රී විභූතියක සාක්ෂි පමණක් දරා සිටින වලව්ව පිහිටියේ පහන් කවුළු තාප්පයෙන් ආරක්ෂාව ලබමිනි. වලව්වක් ලෙස මෙය ගොඩ නැඟෙන්නේ ක්‍රිස්තු වර්ෂ 1700දී රාජ මුද්‍රාව සහිත තඹ උළුකැටයක් රජුගෙන් ලැබීමත් සමඟය.

එතෙක් පැවතුණේ පොල් අතු හෙවිල්ලූ තරමක නිවෙසක් ලෙසිනි. තඹ උළුකැටය ලැබෙන්නේ අපූරු ආකාරයකටය. මඩුවන්වෙල පරපුර පිළිබඳ පැරැණිම ලිඛිත සාක්ෂිය ලෙස සැලකෙන්නේ 1619දී ලියන ලද සපරගමු ලේකම් මිටියයි. දෙවැනි ලිඛිත සාක්ෂිය වන්නේ මේ තඹ උළුකැටයේ කතාවයි. එනිසා ඇතැමුන් සිතන්නේ මඩුවන්වෙල පරපුරේ මූලාරම්භය දාහත්වන සියවසින් ඇරඹෙන බවය. එහෙත් ‘මඩුවන්වෙලට පියමං’ පොතේ සටහන් වන අයුරින් මෙන්ම කුඩා කතරගම බස්නායක නිලමේ උදය ඇමතියගොඩ මහතා ගෙනෙන සාධක අනුව මඩුවන්වෙල පෙළපත ඇරැඹෙන්නේ ‘විජයබා කොල්ලය’ සමයේය.

“හයවැනි විජයබාහු රජ්ජුරුවන්ට පළමු බිසවගෙන් පුත්තු තුන්දෙනෙක් හිටියා. බුවනෙකබාහු, රයිගම් බණ්ඩාර සහ මායාදුන්නෙ කියලා. ඒත් තමන්ගෙන් පස්සේ ඔටුන්න හිමි කුමාරයා බවට නම් කරන්න යන්නේ දෙවැනි බිරියගේ කලින් විවාහයේ පුතා දේවරාජ. මේ කුමාරයා වයසිනුත් බාලයි. අනෙක මේක බිසවයි කඳුරේ බණ්ඩාර සහ ඒකනායක මුදලි කියන ප්‍රධාන ඇමැතිවරු දෙන්නෙකුයි කළ කුමන්ත්‍රණයක්. මේ ගැන ආරංචි වන කුමාරවරු උඩරට පාලනය කරන ජයවීර බණ්ඩාරත් උදවු කරගෙන පියරජතුමාට එරෙහිව සේනාව සංවිධානය කරනවා. වයසක රජතුමා බය වෙලා සාමසාකච්ඡා මඟින් විසඳුමකට එමු කියලා පණිවිඩ යවනවා. ඒකත් කුමන්ත්‍රණයේ කොටසක් කුමාරයන් අල්ලගන්න.

ඒ වුණත් කුමාරයන් කියන්නේ ඇමැතිවරු දෙන්නා දෙනවා නම් විතරක් සාකච්ඡාවට එකඟයි කියලයි. බැරිතැන ඇමැතිවරු දෙන්නා කුමාරවරුන් කඳවුරු බැඳලා තිබුණ කැලණියට එවලා වෙන උපායකින් පුතුන් තිදෙනාව අල්ලාගන්න රජ්ජුරුවෝ සැලසුම් කරනවා. ඒත් කැලණි යන අතරමඟදි ඒකනායක මුදලි පැනගන්නවා. කඳුරේ බණ්ඩාර කුමරවරුන්ගෙන් මැරුම්කනවා. පැනගත් ඒකනායක මුදලි සපරගමුවේ සාමාන්‍ය ගැමියෙක් වගේ හැංගිලා ඉන්නවා.” ඇමතියගොඩ නිලමේ විස්තර කළේය. ඉතිරිය විමලසිරි මහතා සම්පූර්ණ කරයි.

“විජයබා කොල්ලයෙන් කුමාරවරු දිනපු බව දැනගත්තාම කොලොන්න පැත්තට පැනගන්න මුදලි මේ පාළු පෙනුම තිබෙන ස්වාභාවික කඳු වළල්ලෙන් වට වුණු ප්‍රදේශයේ තල්ගහ කොරටුවේ පුංචි ගෙයක් හදාගෙන අත්වල කරගැට එනකල් වගා වැඩ කරලා ඒකනායක නම හංගාගෙන හිටියා. හැබැයි ගම්මුන්ට උදවුපදවු කරලා ජනප්‍රසාදයටත් පත් වුණා. අද දෙදරන්ගමුව වෙහෙර කියන දෙබරන්ගමුව විහාරය එහෙම කළාට පස්සේ ඒකනායක ගම්මුන්ගේ ගෞරවනීය චරිතයක් වුණා. ගමේ හොඳ පවුලකින් පෙළවහකුත් කරගත්තා.

ඒ අයට ලැබුණා පුතෙක්. ඒකනායක මුදලි මේ පුතාට තමන්ගේ රහස කීවා ඒ වගේම දන්න හැම දේම ඉගැන්නුවා. තරුණ පුතා යනවා හේන් කොටන්න බල්ලන්දෑවට. එතැනදි තමයි අර හාවාට නරියා පැරදෙනවා දකින්නේ. හාවා කන් දෙක උස්සලා කකුල්දෙකෙන් හිටගෙන බැලුවලු නරියා දිහා නරියා බය වෙලා පැනලම දිව්වලු. ඒ තැන තමයි මේ වලව්වේ මුල් ගේ හදන්නේ. මේ තියෙන්නේ ඒ තැන.”
කාමර කොටස් 131ක් සහ මැද මිදුල් 42ක් තිබූ වලව්වේ එක මැද මිදුලක් අලංකාරවත් අයුරින් වට කර තනා තිබේ.

ඒ හරියටම හාවාට නරියා බිය වූ ස්ථානය යැයි විශ්වාස කෙරේ. ‘මඩුවන්වෙලට පියමං’ පොතෙන් වෛද්‍ය ශාන්ත දුනුකාර තර්ක කරන්නේ ගම්පොළ රාජධානි සමයේ ආර්ය චක්‍රවර්තීන් දකුණ ආක්‍රමණය මෙල්ල කිරීමට බලකොටුවක් තැනීමට ස්ථානයක් සොයමින් සිටියදී තුන්වැනි වික්‍රමබාහු රජුගේ අග්‍ර පුරෝහිත නිශ්ශංක අලගක්කෝනාරට දියවන්නා ඔය අසල නයකුට මුගටියකු පරාද වූ බව දැනගන්නට ලැබී එතැන ජය බිමක් බව දැන කොටුව ඉදි කළේලු.

එවැනි දෑ දන්නේ රාජසභාවල උන් අය පමණි. එනිසා එවැනි දැනුමක් පුතුට එන්නේ ඒකනායක මුදලිඳුගේ පැරණි ඉගැන්වීම්වලින් විය යුතු බවයි. එනිසා මඩුවන්වෙල වලව්වේ ඉතිහාසය 1521 දක්වා ගමන් කළ යුතු නිසාය.
මේ පිළිබඳ තර්ක-විතර්ක කරමින් සිටින අපට දැනගන්නට ලැබුණේ අපූරු කතාවකි. ඒ අවසන් වශයෙන් මේ වලව්වේ විසූ මඩුවන්වෙල දිසාවේ උපන් කාමරයේදී කරලිනා හාමි නමින් සිටි සේවිකාවක දකින්නට ඇතැමුන්ට හැකි වන බවයි.

ඇමෙරිකානු ඉතිහාසයේ කළු පැල්ලම වෝටර්ගේට් අපවාදය

ඇමෙරිකානු ඉතිහාසය තුළ ජනාධිපතිවරයෙකු මුහුණ දුන් ආන්දෝලනාත්මක සහ අපකීර්තිමත් සිදුවීමක් ලෙස සැලකෙන වෝටර්ගේට් අපවාදය පිළිබඳවයි මෙම ලිපියෙන් විස්තර වන්නේ.

වියට්නාම් යුද්ධය, පෙන්ටගන් පත්‍රිකා වැනි එකිනෙක හා බැඳුනු සිදුවීම් සමූහයක් වෝටර්ගේට් අපවාදය හා සම්බන්ධ වූවත්, මෙම සිදුවීමේ ආරම්භය ලෙස සැලකෙන්නේ වොෂින්ටනයේ වෝටර්ගේට් සංකීර්ණයේ පිහිටා තිබූ ඩිමොක්‍රටික් ජාතික කමිටු (DNC)  ගොඩනැගිල්ලක සිදු වූ සොරකමක්.

සිදුවීම් දාමයක ආරම්භය

ඒ 1972 වර්ෂයයි. ඇමෙරිකාවේ එවක ජනාධිපතිවරයා වූයේ තිස් හත් වෙනි ඇමෙරිකානු ජනාධිපතිවරයා වූ රිචඩ් එම්. නික්සන්. මේ සමයේ දී මීළඟ ජනාධිපතිවරයා තෝරා පත් කර ගැනීමට කටයුතු සංවිධානය වෙමින් පැවතුණා. මේ සඳහා රිපබ්ලිකන් පක්ෂ අපේක්ෂකයා වශයෙන් නැවත වරක් ඉදිරිපත් වූයේ රිචඩ් නික්සන් ජනාධිපතිවරයා.

රිචඩ් නික්සන් ජනාධිපතිවරයා. (wikiwand.com)

වියට්නාම යුද්ධය හා සම්බන්ධ මතවාද නිසා රට තුළ පැහැදිලි පිල් බෙදීමක් දක්නට ලැබුණු නිසා, නැවතත් රිචඩ් නික්සන් ජනාධිපතිවරයා පත් කර ගැනීමට නම් දැඩි ක්‍රියාමාර්ගයක් ගැනීමේ අවශ්‍යතාවය නික්සන්ගේ මැතිවරණ සංවිධායකයන් (Nixon’s Committee to Re-Elect the President හෙවත් CREEP) අවබෝධ කර ගෙන සිටියා.

එනිසා පස් දෙනෙකුගෙන් සමන්විත කණ්ඩායමක් 1972 මැයි මස වෝටර්ගේට් සංකීර්ණයේ පිහිටා තිබූ DNC කාර්යාලයට හොරෙන් ඇතුල් වී අතිශය රහසිගත ලිපිගොනු සොරා ගෙන දුරකථන මාර්ග ටැප් කරනු ලබනවා.

වෝටර්ගේට් සංකීර්ණය (history.com)

මෙම කණ්ඩායමේ සාමාජිකයන්ගෙන් තිදෙනෙක් කියුබානු ජාතිකයන්. එක් අයෙක් ඇමෙරිකානුවෙක් සහ අනෙකා CIA නියෝජිතයෙක්.

නමුත් මෙම ටැප් කිරිම නිසියාකාරයෙන් සිදු නොවූ නිසා නැවතත් ජූනි මස 17 වන දින හිමිදිරියේ පස් දෙනෙකුගෙන් සමන්විත කණ්ඩායමක් නැවතත් වෝටර්ගේට් ගොඩනැගිල්ලට ඇතුල්වන්නේ නව මයික්‍රොෆෝනයක් පවා සවි කිරීමේ අදහසින්. නමුත් විමසිලිමත් මුර භටයෙකුගේ ක්‍රියාව නිසා මොවුන් පොලිස් අත්අඩංගුවට පත් වෙනවා.

මුලින්ම මොවුන් ජනාධිපතිවරයා හා සම්බන්ධ බව හෙළි නොවූවත් පසුව පරීක්ෂණ  කටයුතු කරගෙන යාමේ දී ධවල මන්දිරය හා සම්බන්ධ දුරකථන අංක සැකකරුවන් සතුව තිබී හමු වෙනවා. නමුත් අගෝස්තු මාසයේ දී නික්සන් මේ සම්බන්ධව තමාගේ නිර්දෝශීභාවය ඉදිරිපත් කරමින් කතාවක් සිදු කරනවා. ඔහුගේ බොහෝ අනුගාමිකයන් ඔහුව විශ්වාස කරන අතර 1972 නොවැම්බර් මාසයේ නැවතත් රිචඩ් නික්සන් ජනාධිපතිවරයා ලෙස තේරී පත් වෙනවා.

නීතිය අයථා ලෙස ක්‍රියාවේ යෙදවීම

පසුව හෙළි වන පරිදි නික්සන් මුල සිටම අවංකව  කටයුතු කර තිබුනේ නැහැ. සොරකමට සම්බන්ධ වූ පස් දෙනාට එයින් දින කිහිපයකට අති විශාල මුදල් සම්භාරයක් ලැබෙන්නට සලස්වනවා. එසේම මෙම සිදුවීම සම්බන්ධව කටයුතු කරමින් සිටි FBI නියෝජිතයන්ගේ ක්‍රියාවන් වැලැක්වීමට CIA නියෝජිතයන් යොදවනවා. මෙය සොරකමටත් වඩා බැරෑරුම් අපරාධයක් යටතට ගැනෙන අතර ජනාධිපති වරයා සතු බලතල අයථා ලෙස යෙදවීමක්.

බොබ් වුඩ්වර්ඩ් සහ කාර්ල් බර්න්ස්ටීන් ගේ මෙහෙයුම

ටිකෙන් ටික සිදු වීමේ උණුසුම මැකී යන ලෙස කරුණු සිදු වූවත්, එවක වොෂින්ටන් පෝස්ට් හි වාර්තාකරුවන් දෙදෙනෙකුව සිටි බොබ් වුඩ්වර්ඩ් සහ කාර්ල් බර්න්ස්ටීන් ඇතුළු තවත් පිරිසක් මෙම සිදු වීම යටපත් වීමට ඉඩ දුන්නේ නැහැ. ඔවුන් විශ්වාස කළා මෙහි මතුපිටින් පෙනෙනවාට වඩා වැඩි යමක් ඇති බවට. මෙහිදී නික්සන්ගේ වෝටර්ගේට් හා සම්බන්ධ සෘජු මැදිහත් වීම පිළිබඳවත්, මෙම සම්පූර්ණ ක්‍රියාදාමය හා ජනාධිපතිවරණ ප්‍රචාරණ  කටයුතු සඳහා අයථා අන්දමින් උපයන ලද මුදල් භාවිතා කළේ ද යන වග පිළිබඳවත් ඔවුන් විසින් සැක සාංකා මතු කළා.

බොබ් වුඩ්වර්ඩ් (දකුණේ) සහ කාර්ල් බර්න්ස්ටීන් (වමේ) (time.com)

එසේම මෙම සිදුවීමට අදාල ඇතැම් රහසිගත තොරතුරු මොවුන්ට ලැබෙනවා. ඒ Deep throat යන අන්වර්ථ නාමයකින් හඳුන්වා ගත් අයෙකුගෙන්. සිදු වීමෙන් වසර තිහකට පසු හෙළිදරව් වන පරිදි, Deep throat යනු එවක FBI හි නියෝජ්‍ය අධ්‍යක්‍ෂවරයෙක් ව සිටි W මාර්ක් ෆෙල්ට්.

මාර්ක් ෆෙල්ට් (nypost.com)

ඉහළම පීඩනය

මේ විමර්ශනත් සමඟ ඇති වූ පීඩනයන් නිසා අදාල සිදුවීමට සම්බන්ධ ඇතැම් පාර්ශවයන්ගේ නික්සන් කෙරේ තිබූ පක්ෂපාතීත්වය ගිලිහෙන්නට පටන් ගන්නවා. නික්සන්ගේ ආධාරකරුවන් පිරිසක් විසින් නික්සන්ට විරුද්ධව සාක්ෂි දීමට පෙළඹෙනවා. එසේම ඔවුන් ප්‍රකාශ කර සිටිනවා නික්සන් විසින් ඕවල් කාර්යාලයේ සිදු වූ සාකච්ඡා සියල්ල පටිගත කර ඇති බවත්, එම හඬ පට ලබා ගත හැකි නම් නික්සන්ගේ වරදකාරී බව ඔප්පු කළ හැකි බවත්.

නමුත් නික්සන් විසින් මෙම හඬ පට ලබා දීම දැඩි ලෙස ප්‍රතික්ෂේප කරනවා. අවසානයේ දී ඔහු තමා සතුව ඇති බලතල පාවිච්චි කරමින් එම හඬ පට තමා වෙත රඳවා ගැනීමට උත්සාහ දරනවා. නමුත් නීති ක්‍ෂේත්‍රයේ ඉහළ නිළධාරින් කෙසේ හෝ එය ලබා ගන්නට උත්සාහ දරනවා. මෙය අවසන් වන්නේ ජනාධිපති විසින් ඇතැම් නිලධාරින් සේවයෙන් පහ කීරීමෙනුත්, එයට සමස්ත නීතිය හා සම්බන්ධ නිළධාරීන්ගේ අප්‍රසාදය යොමු වීමෙනුත්.

අවසානයේදී නික්සන් සියළුම හඬ පට නැතත් කිහිපයක් පමණක් දීමට එකඟත්වය පල  කරනවා. නික්සන් හඬ පට 9ක් ලබා දීමට එකඟ වූවත්, ලබා දෙන්නේ 7ක් පමණයි. එයිනුත් එකක විනාඩි දහ අටක පමණ කාල අන්තරයක් තිබෙනවා. මෙය අත්වැරදීමක් විය නොහැකි බව සලකා අවසානයේ දී එරට ශ්‍රේෂ්ඨාධිකරණය විසින් නික්සන් හට නියෝග කරනවා එම හඬ පට පරීක්‍ෂන කටයුතු සඳහා ලබා දෙන ලෙසට.

අවසානයේ නීත්‍යානුකූලව කටයුතු නොකිරීම, බලය අයථා ලෙස පරිහරණය, අපරාධ වසන් කිරීම යන වරදවලට නික්සන්ට චෝදනා එල්ල වෙනවා.

1974 අගෝස්තු මස 5 වන දින මෙම හඬ පට මුදා හැරෙනවා. එයින් වෝටර්ගේට් සිද්ධිය හා සම්බන්ධව නික්සන්ගේ ඇති සම්බන්ධතාවය තහවුරු වෙනවා. අගෝස්තු 8 වෙනි දින ඔහු ජනාධිපති ධූරයෙන් ඉල්ලා අස් වෙනවා.

නව ජනාධිපති පත්වීම

උප ජනාධිපති වශයෙන් සිටි ජෙරාඩ් ෆෝඩ් මීළඟ ඇමෙරිකානු ජනාධිපතිවරයා බවට පත් වෙනවා. ඒ නික්සන්ගේ ඉල්ලා අස් වීමෙන් සති හයකට පමණ පසුව. ඔහු හිටපු ජනාධිපතිවරයාට සම්පූර්ණ සහ කොන්දේසි විරහිත සමාව ලබා දෙනවා. නමුත් නික්සන්ගේ ආධාරකරුවන් එතරම් වාසනාවන්ත වන්නේ නැහැ. ඔවුන් කළ වැරදි වලට දඬුවම් ලබනවා.

ජෙරාඩ් ෆෝඩ් (wikipedia.org)

වෝටර්ගේට් සිදුවීම පිළිබඳ ව විවිධ මතවාද තිබෙනවා. ඇතැමුන් එය නික්සන් ජනාධිපතිවරයා උගුලක සිර කිරීමට කළ කුමන්ත්‍රණයක් බවත් පවසනවා. කෙසේ නමුත්, මෙම වෝටර්ගේට් සිදුවීම ඇමෙකාව පමණක් නොව ලෝකය පුරාම ආන්දෝලනයකට ලක්වූ සිදුවීමක්. එසේම මෙම සිදු වීම අලලා නිපදවූ චිත්‍රපටි විශාල ගණනක් තිබෙනවා. මෙම සිදුවීම නිසා ජනාධිපතිවරයාගේ පාරිශුද්ධත්වය කෙරෙහි ජනතා අවධානය යොමු වීම ආරම්භ වුණා. එය අවසානයේ වූ යහපත් ප්‍රතිඵලයක් ලෙස හඳුන්වන්නට පුළුවන්.

ප්‍රවීණ චිත්‍රපට අධ්‍යක්ෂ ඉන්ග්මාර් බර්ග්මාන්

ලෝක සිනමාව යන විෂය සැලකිල්ලට ගැනීමේදී පළමු කතානාද චිත්‍රපටය වූ, 1927 වසරේ තිරගත වූ 'ද ජෑස් සිංගර්' චිත්‍රපටය බිහිවීමෙන් පසු ලොව පුරා විශිෂ්ට සිනමා අධ්‍යක්ෂකවරුන් බිහිවුණා. යුරෝපය ද එවැනි විශිෂ්ටතමයින් රාශියක් ලොවට දායාද කළ මහාද්වීපයක්.

ස්කැන්ඩිනේවියාවට අයත් ස්වීඩනය ලෝක සාහිත්‍යයට ඉතා විශාල මෙහෙයක් සිදුකළ රටක්. ලෝක සිනමාවටත් ස්වීඩනයෙන් මහඟු දායාද කිහිපයක්ම ලැබුණා. ඒ අතරින් ප්‍රවීණ චිත්‍රපට අධ්‍යක්ෂ ඉන්ග්මාර් බර්ග්මාන්ට හිමිවන්නේ ප්‍රමුඛතම ස්ථානයක්. විසිවන සියවසෙහි බිහිවූ ලොව විශිෂ්ටතම සිනමාකරුවන් කිහිපදෙනා අතර ඉදිරි ස්ථානයක ඔහුගේ නාමය වැජඹෙනවා. ඔහුටම ආවේණික වූ ශෛලියකින් නිර්මාණ කළ බර්ග්මාන් අධ්‍යක්ෂණය කළ, ලෝ පතල සිනමා කෘතීන් කිහිපයක්ම වෙනවා.

ලෝකයේ පළමු ස්මාර්ට් ෆෝන් එක

හරි ඔයාල දන්නේ නැතිවට 2014 අගෝස්තු මාසේ 16 වෙනිදාට ලෝකේ පළමු ඉස්මාර්ට් ෆෝන් එක නිපදවල අවුරුදු 20 වෙනවා, ඒ කියන්නේ දැන් ඉස්මාර්ට් ෆෝන් ගතකරන්නේ එයාගේ බද්‍ර යවුවනය කිවුවට ඔයාලා මාත් එක්ක තරහ වෙන එකක් නැහැ.

හරි හරි දැන් බලමු මොකද්ද මේ හා හා පුරා කියල ඉස්සෙල්ලම හදපු ඉස්මාර්ට් ෆෝන් එක කියල. මේකේ නම තමයි අයි.බි.එම්. සිමොන්(IBM Simon) ඒක නිෂ්පාදනය කරලා තියෙන්නේ ලෝකප්ප්‍රසිද්ද අයි.බි.එම්. ආයතනය මගින්.

මේක ඇවිල්ල ඒ දවස් වල හදුන්වල තියෙන්නේ ඉස්මාර්ට් ෆෝන් කියන නමෙන්නම් නෙවෙයි මොකද ඒ වෙනකොට "ඉස්මාර්ට් ෆෝන්" කියන වචනය බිහිවෙලා නොතිබුන නිසා. නමුත් මෙම ගැජට් ඒකක 50,000 ආසන්න ප්‍රමාණයක් අයි.බි.එම්. ආයතනය මගින් වෙළද පොලට නිකුත් කරලා තියනවා ඒ එහි වටිනාකම ඇමරිකානු ඩොලර් 899 ලෙස සටහන් කොට(එම මුදලේ වර්තමාන වටිනාකම ඇ. ඩො. 1400 පමණ).

හරි මම තවම කිවුවේ නැහැ නේ මේ ඉස්මාර්ට් ෆෝන් එකෙන් මොනවද කර ගන්න පුළුවන් වුනේ කියලා.

01. දුරකථන ඇමතුම් ලබා ගැනීමේ හැකියාව. (මේකටනම් ඉස්මාර්ට් ෆෝන් එකක්ම වෙන්න ඕනේ නැහැ නේ)
02. මේක ඇවිල්ල ටච් ඉස්ක්‍රින් වර්ගයේ දුරකතනයක්.
03. ෆැක්ස් පණිවිඩ යැවීමේ සහා ලැබිමේ හැකියාව.
04. ඉ-මේල් යැවීමේ සහ ලැබීමේ හැකියාව.
05. සෙලියුලර් පේජස් යැවීමේ සහ ලැබීමේ හැකියාව.
06. ලිපන නාමාවලියක්(addres book).
07. කැලැන්ඩරයක්.
08. හමුවීම් කළමනාකරණයක් (appointment scheduler).
09. ගණක යන්ත්‍රයක්(calculator).
10. ඔරලෝසුවක්.
11. සටහන් පොතක් (electronic note pad).

ඔන්න ඔය වගේ දේවල් ගොඩක් කර ගන්න මේ Smart Phone එකෙන් පුළුවන් වුනා.

ලෝකයේ විශාලතම මල ගැන බිඳක්

ලෝකයේ විශාලතම මලලෙස සැලකෙන්නේ රැෆ්ලේෂියා ආර්නෝල්ඩ් නම් මලයි.මෙය පරපෝෂිත මලකි.එය වැවෙන්නේ අග්නිදිග ආසියාවේ ඝන වැසි වනාන්තර තුල පමණි.එම නිසා මෙම මල උද්භිද උද්‍යානවලවත් දකින්න ලැබෙන්නේ නැ.පෙති විහිදුනු පසු මෙම මලේ විෂ්කම්භය අඩි 3ක් පමණ වෙන අතර එවිට මෙම මලේ බර සාමාන්‍යයෙන් 7kg පමණ වෙනවා.සාමන්‍යයෙන් මිනිසුන් මෙම මල හදුන්වන්නේ මළකුණු ගද ඇති ලිලි මල යනුවෙන්.මෙහි සුවද නිසා එවැනි ලෙස අමතනවා විය හැක.මේ මල පවතින්නේ දින 5ක් 7ක් වැනි කාලයක්.මෙම මලෙහි සුවදට කෘමි සතුන් විශාල ප්‍රමාණයක් ඇදී එනවා.මේ මල තද රතු පැහැයට ආසන්න වර්ණ කිහිපයකින් දැකිය හැකියි...........

සන්නිවේදන අධ්‍යනයෙහි ආරම්භය හා වර්ධනය

වර්තමානයේදී ජනමාධ්‍ය මුල් කොට ගනිමින් ලෝකයේ පවතින සන්නිවේදන ක්‍රියාදාමය පිලිබද විමර්ශනයේදී අනාවරනය වන්නේ එය දීර්ඝ කාලීන විකාශනයක ප්‍රථිඵලයක් බවය. මානව සන්නිවේදනය ආරම්බ වී බොහෝ කාලයක් ගත වුවද සන්නිවේදනය විෂයක් ලෙස අධ්‍යනය කිරීම ආරම්බ වී ගතව ඇත්තේ ඉතා කෙටි කාලයකි.

සන්නිවේදනය යන සංකල්පයෙන් විග්‍රහ වනුයේ එක් පුද්ගලයකු විසින් තවත් පුද්ගලයකුට හෝ කන්ඩායමකට අදහස් හා තොරතුරු හුවමාරු කර ගැනීමය. එය සන්නිවේදනය යන්නෙහි මූලිකම අදහසයි. නමුත් වර්තමනයේදී සන්නිවේදනය යන්නෙන් ඉහත මූලික අදහසට වඩා විස්තීරන බවක් පෙන්නුම් කරයි.එනම් අද වන විට සන්නිවෙදනය යන්නෙන් හුදෙක්ම එක් පර්ශවයකින් තවත් පාර්ශවයක් වෙත කෙරෙන තොරතුරු හුවමරුව ඉක්මවා ගිය ගෝලීයකරණය වූ සන්නිවෙදන ක්‍රියාදාමයක් සිදුවන බවය. එසේම ජනමාධ්‍ය හා තාක්ෂණිකමය වශයෙන් වර්ධනය වූ නවීන සන්නිවේදනය බහුවිධ මානව හා භෞතික සම්පත් උපයොජනයකින් සමන්විත වන සංකීර්ණ ක්‍රියාදාමයකි. මෙම කරුණු පදනම් කර ගනිමින් අද වන විට සන්නිවේදනය සමාජීයව වැදගත්වන සංසිද්ධියක් බවට පත්ව තිබේ. 20 වන සියවසේ ආරම්බයත් සමගම සන්නිවේදන විෂය ශාස්ත්‍රීය පදනමක් සහිතව අධ්‍යනය කරන විෂයක් ලෙස නූතන සමාජ ශාස්ත්‍ර විෂය ධාරාවට පිවිස තිබේ.එසේම අද වන විට සන්නිවේදනය ඉතා ජනප්‍රිය සේම ලොව පුරා විශ්ව විද්‍යාලවල අධ්‍යනයන්ට ලක්වන පුළුල් පරාසයක් කරා විසිරී ඇති විෂයක් බවට පත්ව තිබේ.

සන්නිවේදන අධ්‍යනයෙහි ආරම්භය පිලිබදව විමසීමේදී 1900 මුල් දශකයෙන් පසුව එහි ආරම්භය සනි‍ටුහන් කිරීමට චාල්ස් ඩාවින්ගේ පරිණාමවාදය සිග්මන් ෆ්‍රොයිඩ් ඉදිරිපත් කල මනෝ විශ්ලේෂණ වාදයත් කාල් මාක්ස් ඉදිරිපත් කල මාක්ස්වාදයත් යන මේ දාර්ශනික වූ න්‍යායික බුද්ධිමය පදනම මේ සදහා වක්‍රාකාර බලපෑමක් වූ බව සදහන් කල හැකිය.

1933 දී ඇඩොල්ෆ් හිට්ලර් ජර්මනියේ ආරම්භ කල නාසි පාලනයත් සමග යුරෝපීය විද්වතුන් විශාල පිරිසක් ඇමරිකාවට සංක්‍රමනය විය. ජර්මනියේ ජාතික විශ්ව විද්‍යාල වලින් පිටමන් කල විද්වතුන් විශාල පිරිසක් මේ අතර වූහ. ඒ අතරට ඇල්බට් අයින්ස්ටයින්, එරික් එරික්සන්, ජෝන් වෝග් නියුමාන්, කර්ට් ලෙවින් ආදී විශිෂ්ට ගනයේ විද්වතුන්ද ඇතුලත් විය. එපමනක්ද නොව 'ෆැන්ක්ෆර්ට්' ගුරුකුලයද ඒ අතර විය. මෙම නිසා ඇමරිකාව තුළ විශ්ව විද්‍යාල කේන්ද්‍ර කර ගනිමින් විශාල ශාස්ත්‍රීය ප්‍රබෝධයක් ඇති වන්නට අවශ්‍යය පදනම සකස් විය. සන්නිවේදන අධ්‍යන ඇමරිකාව තුළ ඇති වන්නට අවශ්‍යය පසුබිම සැකසෙන්නේද මේ පසුබිම තුළය. නමුත් ඇමරිකාව තුළ සන්නිවේදන අධ්‍යනයන්ට පුරෝගාමී වූ කර්ට්න් ලෙවින් මෙන්ම ගර්බ්නර් ද සිය ආචාර්ය උපාධි ලබාගෙන තිබුනේ ජර්මනියෙන් සහ හංගේරියාවෙන්ය මෙම නිසා සන්නිවේදන අධ්‍යයන ඇමරිකාවේ ආරම්භ වුවද එහි මූලාරම්භය යුරෝපයේ ඇති වූ බව සදහන් කල හැකිය.

මෙසේ ආරම්භ වන සන්නිවේදන අධ්‍යයන ක්ෂේත්‍රයෙහි අභිවර්ධනයෙහිලා විශාල බලපෑමක් කල ගුරුකුලයක් ලෙස 'චිකාගෝ ගුරුකුලය' හදුනාගත හැකිය. 1892 චිකාගෝ විශ්ව විද්‍යාලයෙහි ශාස්ත්‍ර සම්ප්‍රදායට අයත් වූ බුද්ධිමතුන් පිරිස මෙනමින් හැදින්වේ. සන්නිවේදන න්‍යාය හා පර්යේෂන සදහා මෙම ගුරු කුලය බෙහෙවින් වැදගත් විය. ඇමරිකානු සමජ ශාස්ත්‍ර අධ්‍යයන ක්ෂේත්‍රයෙහි නව වෙනසක් කිරීමට මෙම ගුරු කුලයට හැකි විය. සන්නිවේදනයෙහි මානවීය හා සමාජීය වටිනාකම ප්‍රත්‍යක්ෂ කල චිකාගෝ විද්වත්හු අනාගත සන්නිවේදන පර්යේෂණ සදහා පදනම සැකසූහ. චිකාගෝ විශ්ව විද්‍යාලයෙහි සමාජ විද්‍යාව හා සමාජ මනෝ විද්‍යාව මුල් කරගත් ශාස්ත්‍ර ප්‍රබෝධය හෝට්න් කුලී, ජෝර්ජ් හර්බර්ඩ් මීඩ්, රොබට් ඊ පාක් සහ ජෝන් ඩේව් යන විද්වතුන් විසින් දක්වන ලද අප්‍රතිහත දායකත්වය නිසා ඇති වූවක් බව දැක්විය හැකිය. මෙම සිව්දෙනාම ඔවුනොවුන්ට වෙනස් වූ ශාස්ත්‍රීය පර්යේෂණවල නියුක්තව එවායින් සුපොසිත දැනුම් සම්බාරය මතින් ස්වකීය දායකත්වය දක්වන ලදි. සන්නිවෙදන අධ්‍යයන ක්ෂේත්‍රය සදහා ඔවුන් දක්වන ලද දායකත්වය සුවිශේෂී වේ. ඔවුන් මනව සන්නිවේද්නයේ පුද්ගල නි ශිත ලක්ෂණ අවද්ධාරනය කලහ.සංදේශයක අර්ථ නිරූපනය එය ප්‍රතිග්‍රහනය කරන ග්‍රාහකයාගේ ස්වභාවය අනුව තීරණය වන බව ඔවුන්ගේ පිලිගැනීම විය. මොවුන්ගේ මෙම සමාජ ශාස්ත්‍රවල ගවේශනාත්මක ප්‍රථිඵල ප්‍රථිපල සන්නිවේදන අධ්‍යයන ක්ෂේත්‍රයෙහි පෝෂණය සදහා හේතු විය.

විවිද හේතූන් මුල් කර ගනිමින් චිකාගෝ ගුරුකුලය 1935 පමණ වන විට විශාල ලෙස පරිහානියකට ලක් වෙමින් පැවතිණි. චිකාගෝ ගුරුකුලය බිද වැටීමට සමගාමීව පෝල් ලැසාස්ෆෙල්ඩ්ගේ මූලිකත්වයෙන් කොලොම්බියා විශ්ව විද්‍යාලය මුල් කරගත් අධ්‍යයන හා පර්යේෂණ ක්‍රියාදාමයක් බිහි විය. නිව්යෝක් නගරය එවක ඇමරිකාවේ නගී ආ සන්නිවේදන හා ප්‍රචාරක කර්මාන්තවල මධ්‍යස්ථානය විය. ලැසාස්ෆෙල්ඩ් හා කොලොම්බියා විශ්ව විද්‍යාලයෙහි විද්වත් එකමුතුව විසින් ජනසන්නිවේදනයේ බලපෑම ආදී ජාතික මට්ටමේ පර්යේෂණ ගැටලු අධ්‍යයනය කිරීමට පටන් ගත්හ. සන්නිවේදන අධ්‍යයන ඉතිහාසය පිලිබද විමර්ශනයේදී 1920-40 අතර කාලයේ එය ආරම්භ වන්නේ විචිධ විෂයන් පිලිබදව විශ්‍රාරදයින්ගේ දැනුම් සම්භාරය මතින් බව පැහැදිලිය. එහිදී ප්‍රචාරණය පිලිබද ලැසාස්වෙල්ගේ ආනුභවික අධ්‍යනයත්,ග්‍රාහක සමූහ වෙත ගුවන් විදුලියේ බලපෑම පිලිබද ලැසාස්ෆෙල්ඩ්ගේ අධ්‍යයනයත් සුවිශේෂී වේ. සන්නිවේදන අධ්‍යයනයන් සදහා හැරල්ඩ් ලැස්වේල් , පෝල් ලැසාස්ෆෙල්ඩ් , කර්ට් ලෙවෙන් සහ කාල් හවුලන්ඩ් අතින් මුලික පදනම සකස් වූ බව සදහන් කල හැකිය. නමුත් එවරට් එම්. පාක් ප්‍රමුඛ චිකාගෝ ගුරුකුලය විසින් ඉදිරිපත් කරන ලද මතවාදයයි. වෝල්ටර් ලිප්මන් මානව සම්බන්ධතාවන්හි සාරය සන්නිවේදනය ලෙස සලකන ලදි. මෙසේ සමජය විෂයෙහි සන්නිවේදන විෂයට හිමි ස්ථානය හා එහි වැදගත්කම පිළිබදව ඉතා වැදගත් සිද්ධාන්තයක් ඉදිරිපත් කිරීමට චිකාගෝ ගුරුකුලයට හැකි විය. කෙසේ නමුත් රොජර්ස් වැඩි දුරටත් සදහන් කරන්නේ චිකාගෝ ගුරුකුලයට වඩා විධිමත් ලෙස සන්නිවේදන අධ්‍යයන ආරම්භයක් සදහා ලැසාස්වෙල්, රොජර් මේ පිලිබදව අදහස් දක්වමින් කියා සිටියේ සන්නිවේදන අධ්‍යයනයන් පිලිබද මුලයන් චිකාගෝ ගුරුකුල විද්වතුන් හා වෝල්ටර් ලිප්මන්ගේද අධ්‍යයයන කරාද විහිදී යන බවය. සන්නිවේදනය යනු හුදෙක් වි පන ප්‍රකාශනය හා ප්‍රචාරණය පමණක් නොවන බවත් එය සමාජය නිර්මාණය කරන සහ සමාජය විසින්ම පවත්වාගෙන යන්නක් බවත් රොබර්ට් ලැසාස්ෆෙල්ඩ්, හවුලන්ඩ්, ලෙවින් යන විද්වතුන්ගෙන් වඩාත් සංවිධිත දායකත්වයක් ලැබුණු බවය.

මහාචාර්ය රොජර්ස් පවසන අන්දමට ප්‍රංශයේ ගේබ්‍රියල් ටාඩේ සහ ජර්මනියේ ජෝර්ජ් සිමෙල් ඇමරිකාවේ ස්න්නිවේදන අධ්‍යයන සදහා විශාල දායකත්වයක් සපයා තිබේ. ගේබ්‍රියල් ටාඩේ ප්‍රංශ ජාතික විනිශ්චය කරුවෙකි ඔහු උසාවියේදී තමා හමුවට පැමිණි පැමිණිලිකරුවන් හා විත්ති කරුවන් සාක්කි කරුවන් හා වෙනත් නීතිවේදීන් ඇතුලු පුද්ගලයින්ගේ චර්යාව පිලිබද සමාජ විද්‍යාත්මක නිරීක්ෂණ සිදු කරන ලදි. ඔහු මෙම අධ්‍යනයන් පදනම් කර ගනිමින් අනුකරණ සිද්ධාන්තය ඉදිරිපත් කරන ලදි. දිනපතා තමන්ට ඇසුරු කරන්නට හෝ ගැටීමට සිදුවන පුද්ගලයන්ගේ චර්යාව මගින් පුද්ගල චර්යාවට දැඩි බලපෑමක් එල්ල වන බවත් ඔහු නිරීක්ෂණ මගින් පෙන්වා දෙන ලදි.

ජෝර්ජ් සිමෙල් විසින් කන්ඩායම් චර්යාව පුද්ගල චර්යාව කෙරෙහි බලපාන අන්දම පෙන්වා දෙන ලදි. ඔහු පළමු වරට The web of Group Affiliations නැමැති කෘතියෙන් ජාල පිලිබද සිද්ධාන්තය ඉදිරිපත් කර පෙන්වා දෙන ලදි. සිමෙල්ට මානව චර්යාව තේරුම් ගැනීම සදහා බෙහෙවින් වැදගත් වූ ප්‍රශ්නය වූයේ සන්නිවේදන සබදතා මගින් කුමන පුද්ගලයා කුමන පුද්ගලයින්ට සම්බන්ධද යන්නයි.

මෙසේ සිමෙල් හා ටාඩේ මුලින්ම යුරෝපයේ සන්නිවේදනය පිලිබද මූලික අදහස ඇති කල නමුත් ඔවුන් දෙදෙනාගේම අදහස් ආනුභවික පර්යේෂණයට බදුන් කිරීමට හැකිවූයේ ඇමරිකාවේය. මානව සන්නිවේදනය නැමැති සමාජ ශාස්ත්‍රයෙහි අභිවර්ධනය උදෙසා ජෝන් ඩේවි, චාල්ස් හෝර්ට්න් කුලී, රොබට් ඊ පාක් හා ජෝර්ජ් හර්බට් මීඩ් යන විද්වතුන් සිව් දෙනාගෙන් විශාල දායකත්වයක් ලැබිණි. මානව චර්යාව පිලිබදව හැදෑරීමට සන්නිවේදනය ගුරු කොට ගත හැකි බව පෙන්වා දුන්නේ මොවුන් විසිනි. කුලී ස්වීයත්වය හා සමාජානුයෝජනය පිලිබද සමාජ විද්‍යා යෙක් වන අතර ඩේව් දාර්ශනිකයෙක් මෙන්ම මනෝ විද්‍ය යෙක් ද වේ. මොවුන් සන්නිවේදන අධ්‍යයන නැමැති නව විෂය සමාරම්බයට මෙන්ම එහි වර්ධනය උදෙසා ඉමහත් මෙහෙයක් කල විද්වතුන් අයත්ව සිටි චිකාගෝ ගුරු කුලයට අයත් වූවෝ වෙති. පනිවිඩයක් සංජානනය කිරීම අත්‍යවශ්‍යයෙන්ම පුද්ගල නි ශිත භාවයෙන් යුත් මානව ක්‍රියාවක් බව අවධාරණය කල මෙම සිවු දෙනා මානව සන්නිවෙදනය පිලිබද විද්‍යාත්මක මුහුනුවරක් ප්‍රකට කලහ. මොවුන් පෙන්වා දුන්නේ ස්න්නිවේදන ක්‍රියාවලියේදී පුද්ගලයා අතිශයින්ම වදගත් වන බවත් පණිවිඩයක් තේරුම් ගැනීම මෙන්ම එම පණිවිඩය අර්ථ නිරූපනය කිරීම පිලිබද කටයුත්ත සම්පූර්ණයෙන්ම පුද්ගලයගේ මනෝ භාවයන් මත ‍රැදී තිබෙන බවය.

චාල්ස් කුලී ප්‍රධාන ලෙසම පර්යේෂණ කටයුතු සිදු කරන ලද්දේ පුද්ගල සමාජානුයෝජනය පිලිබදවයි. ඩේව්ගේ මග පෙන්වීම අනුව ස්පෙන්සර්ගේ අදහස් හා මති මතාන්තර පිලිබදව උනන්දුවක් දක්වන්නට පටන් ගත් කුලී සමාජ විද්‍යාව කෙරෙහි ඇදී ගියේය. මුල් කාලයෙදී කුලී ස්පෙන්සර්ගෙන් බලපෑමක් ලැබූ අතර නමුත් කුලී පසු කාලයේ කියා සිටියේ ආරය හා පෞද්ගලිකත්වය පුද්ගලයකුගේ ස්වීයත්වය තීරණය කිරීම සදහා බල නොපාන බවය. දෙමාපියන්ගෙන් හා තම ආශ්‍රය කරන පුද්ගලයන් සමග කරන පුද්ගලාන්තර සන්නිවේදනය කෙනෙකුගේ සමාජානුයෝජනය කෙරෙහි සේම ස්වීයත්වය කෙරෙහිද බලපාන බව ඔහු පෙන්වා දෙන ලදි. කුලී ජන සන්නිවේදනය පිලිබද යම් ප්‍රගතිශීලී උනන්දුවක් දැක්වුවද වඩා වැඩි උනන්දුවක් දක්වන ලද්දේ පුද්ගලාන්තර සන්නිවේදනය පිළිබදවය. සමාජ ප්‍රගතිය පිලිබද දැඩි උනන්දුවක් දැක්වූ ඔහු එකල පුවත් පත් වාණිජ අරමුණු සදහා යොමුව සිටි බැවින් පුවත්පත් පිලිබද අද්‍යයනයන් සිදු කිරීමට අවධානයක් යොමු නොකරන ලදි. හැරල්ඩ් ලැස්වෙල් සෘජු ලෙස සන්නිවේදනය පිලිබද විද්වතෙක් නොවුනද සන්නිවෙදන අධ්‍යයනයෙහි නව පැතිකඩ සොයා ගැනීම විෂයෙහි ඔහු සුවිශේෂී දායකත්වයක් සපයනු ලබීය.ප්‍රචාරනය, ජනමතය සකස් වීම ජනමාධ්‍ය පිලිබද අන්තර්ගත විෂය විශ්ලේෂණ ආදිය සන්නිවේදන අධ්‍යයන විෂයෙහි අතිශයින් වැදගත් විය.

ඉහත ආකාරයට සන්නිවේදන අධ්‍යයන ආරම්භවීම හා එහි ක්‍රමික වර්ධනය විමර්ශනය කල හැකිය. එහිදී පැහැදිලි වන්නේ ජර්මන් නාසි වාදයත් සමග ඇමරිකාවට සංක්‍රමණය වන ලොව විශිෂ්ටතම සමාජ ශාස්ත්‍ර පිලිබද දාර්ශනිකයින් විසින් සමාජ සංසිද්ධීන් අරභයා සිදු කරන ලද සමීක්ෂණ, පරීක්ෂණ හා විශ්ලේෂණ මත පදනම්ව ඔවුන් විසින් ඉදිරිපත් කරන ලද දාර්ශනික මතවාද ඔස්සේ සන්නිවේදන අධ්‍යයනයෙහි ආරම්භය සිදු වූ බවය. එහිදී චිකාගෝ ගුරුකුලය සේම චිකාගෝ ගුරුකුලයෙහි ක්‍රමවේදාත්මක ප්‍රවේශය තුලින් සමකාලීන සමකාලීන සන්නිවේදන අධ්‍යයන සිදු කල විද්වතුන්ගෙන් සැදුම්ලත් ව්‍යාඛ්‍යායික ගුරුකුලය මගින් එය ක්‍රමිකව අභිවර්ධනය විය. මෙහිදී සදහන් කල යුතු සුවිශේෂී කරුණ වන්නේ සෑම විෂයක්ම ආරම්භ වී ඇත්තේ එම විෂය පිළිබදවම මුලික ධාරණාව රදවා ගනිමින් විෂය සදහාම කැපවූ විද්වතුන් විසින් කරන ලද විවිද පරීක්ෂණ, නිරීක්ෂණ, සම්පරීක්ෂණ පදනම් කොට එලබෙන සිද්ධාන්තයන් මගිනි. නමුත් සන්නිවේදන අධ්‍යනයෙහි අරම්භය පිලිබද ඇත්තේ එවැනි පසුබිමක් නොවේ. එය ආරම්භ වී ඇත්තේ විවිද විෂය ක්ෂේත්‍රයන් පිලිබද ප්‍රවීණත්වයට පත් විද්වතුන්ගේ හා දාර්ශනිකයින්ගේ දායකත්වයෙනි. එසේ සන්නිවේදන අධ්‍යනයෙහි අරම්භය සිදු වූ අතර ඒ සදහා ඇත්තේද කෙටි ඉතිහාසයකි නමුත් අද වන විට මෙම විෂය ලොව පුරා විශ්ව විද්‍යාලවල පාඨමාලා ගතව අධ්‍යයනය කරන කාලීන සමාජීය තත්වයට සමගාමීව ගමන් කරන්නාවූ ඉතා ජනප්‍රිය අධ්‍යයන ක්ෂේත්‍රයක් බවටද පත්ව ඇති බව සදහන් කල හැකිය.